ചെന്നൈ: ഇന്‍സ്റ്റഗ്രാം വഴി സൗഹൃദം സ്ഥാപിച്ച് പ്രായപൂര്‍ത്തിയാകാത്ത സ്‌കൂള്‍ വിദ്യാര്‍ഥിനിയെ ലൈംഗികമായി പീഡിപ്പിച്ച സ്‌കൂള്‍ അധ്യാപകന്‍ അറസ്റ്റില്‍. പ്രതിക്കെതിരെ കടുത്ത വകുപ്പുകള്‍ ചുമത്തിയാണ് പോലീസ് നിയമനടപടികള്‍ സ്വീകരിച്ചിരിക്കുന്നത്.
തമിഴ്‌നാട്ടിലെ ധര്‍മ്മപുരിയിലായിരുന്നു സംഭവം. സ്വകാര്യ വിദ്യാലയത്തില്‍ ജോലി ചെയ്യുന്ന ഇയാള്‍ ഇന്‍സ്റ്റഗ്രാമിലൂടെയാണ് പെണ്‍കുട്ടിയുമായി ആദ്യം സൗഹൃദം സ്ഥാപിക്കുന്നത്. പിന്നീട് കുട്ടിയുടെ വിശ്വാസ്യത പിടിച്ചുപറ്റിയശേഷം പ്രലോഭിപ്പിച്ചും സ്വാധീനിച്ചും കെണിയിലാക്കുകയായിരുന്നു. തുടര്‍ന്ന് പെണ്‍കുട്ടിയുടെ വീട്ടില്‍ ആരുമില്ലാത്ത സമയങ്ങളില്‍ സന്ദര്‍ശനം നടത്തിയാണ് ഇയാള്‍ പീഡനത്തിന് ഇരയാക്കിയതെന്നാണ് പോലീസ് പറയുന്നത്. വീടിന്റെ പിന്‍വാതിലിലൂടെ പ്രതി രക്ഷപെടാന്‍ ശ്രമിക്കുന്നതിന്റെ സിസിടിവി ദൃശ്യങ്ങള്‍ വീട്ടുകാര്‍ കണ്ടെത്തിയതോടെയാണ് സംഭവം പുറത്തുവരുന്നത്.
ഇതിനെത്തുടര്‍ന്ന് ചൈല്‍ഡ് വെല്‍ഫെയര്‍ കമ്മിറ്റിയുടെയും വീട്ടുകാരുടെയും പരാതിയില്‍ പോലീസ് പ്രതിയെ അറസ്റ്റ് ചെയ്യുകയും കോടതിയില്‍ ഹാജരാക്കി ജുഡീഷ്യല്‍ കസ്റ്റഡിയില്‍ വിടുകയും ചെയ്തു. പെണ്‍കുട്ടി പ്രായപൂര്‍ത്തിയാകാത്തതിനാല്‍ കുട്ടിയുടെ സമ്മതപ്രകാരമാണ് എന്ന് വാദിക്കാന്‍ പ്രതിക്ക് യാതൊരു നിയമപരമായ അവകാശവുമില്ലെന്നും, ഇത് വ്യക്തമായ ലൈംഗിക അതിക്രമമാണെന്നും അന്വേഷണ ഉദ്യോഗസ്ഥര്‍ മാധ്യമങ്ങളോട് പ്രതികരിച്ചു. സംഭവം എത്ര നാളായി തുടരുന്നു എന്നതിനെക്കുറിച്ച് വിശദമായ അന്വേഷണം നടത്തിവരികയാണ്.
