ന്യൂഡൽഹി: എച്ച്-1ബി വിസ തൊഴിലാളികളെ 'കരാർ അടിമകൾ' എന്ന് വിശേഷിപ്പിച്ച യു എസ് വൈസ് പ്രസിഡന്റ് ജെ.ഡി വാൻസിന്റെ പ്രസ്താവനയ്‌ക്കെതിരെ രൂക്ഷവിമർശനവുമായി ഇന്ത്യയുടെ വിദേശകാര്യ മന്ത്രാലയം രംഗത്തെത്തി. വാൻസിന്റെ പരാമർശങ്ങൾ "അനാവശ്യമാണെന്നും" ഉപയോഗിച്ച വാക്കുകൾ "അങ്ങേയറ്റം അപമാനകരമാണെന്നും" വിദേശകാര്യ മന്ത്രാലയം വെള്ളിയാഴ്ച വ്യക്തമാക്കി.
വിസ തട്ടിപ്പുമായി ബന്ധപ്പെട്ട് വാർത്താസമ്മേളനത്തിൽ സംസാരിക്കവെയാണ് അമേരിക്കൻ ജീവനക്കാരെ പിരിച്ചുവിട്ട് കുറഞ്ഞ വേതനത്തിൽ വിദേശ തൊഴിലാളികളെ കമ്പനികൾ കൊണ്ടുവരികയാണെന്ന് വാൻസ് ആരോപിച്ചത്. "നിങ്ങൾ അമേരിക്കയിൽ എച്ച്-1ബി വിസയിലാണ് ജോലി ചെയ്യുന്നതെങ്കിൽ, അതേ തസ്തികയിലുള്ള ഒരു അമേരിക്കൻ പൗരനേക്കാൾ 20,000 ഡോളർ കുറവാണ് നിങ്ങൾക്ക് ലഭിക്കുന്നത്. വിദേശ ഔട്ട്‌സോഴ്‌സിംഗ് സ്ഥാപനങ്ങൾ വഴിയാണ് നിങ്ങളെ കൊണ്ടുവന്നതെങ്കിൽ, സമാന തസ്തികയിലുള്ള അമേരിക്കക്കാരനേക്കാൾ 48,000 ഡോളർ കുറവായിരിക്കും നിങ്ങളുടെ വേതനം. അതിനാൽ ഇവിടെ നടക്കുന്നത് എന്താണെന്ന് എല്ലാവർക്കും മനസ്സിലാകും. വിദേശത്തുനിന്ന് കരാർ അടിമകളെ കൊണ്ടുവരിക, അമേരിക്കൻ തൊഴിലാളികളെ പിരിച്ചുവിടുക; തുടർന്ന് വേതനം കുറച്ച് പകരം ആളുകളെ നിയമിക്കുന്നതിലൂടെ വലിയ തുക ലാഭമുണ്ടാക്കുക എന്നതാണ് കമ്പനികൾ ചെയ്യുന്നത്. യഥാർത്ഥത്തിൽ ഇവർ അമേരിക്കയിൽ ഉണ്ടാകേണ്ടവർ പോലുമല്ല," വാൻസ് പറഞ്ഞു.
വാൻസിന്റെ പ്രതികരണത്തോട് പ്രതികരിച്ചുകൊണ്ട് മന്ത്രാലയം വ്യക്തമാക്കി: "യു.എസ് വൈസ് പ്രസിഡന്റിന്റെ ചില പരാമർശങ്ങൾ ഞങ്ങൾ കണ്ടു. ഇത്തരം വിശേഷണങ്ങൾ അനാവശ്യമാണെന്ന് ഞങ്ങൾ വിശ്വസിക്കുന്നു. അമേരിക്കയിലുള്ള ഇന്ത്യൻ പ്രൊഫഷണലുകൾ ഉന്നത വിദ്യാഭ്യാസമുള്ളവരും അവിടെയുള്ള സമ്പദ്‌വ്യവസ്ഥയ്ക്കും നവീകരണങ്ങൾക്കും മികച്ച സംഭാവനകൾ നൽകുന്നവരുമാണെന്ന യാഥാർത്ഥ്യത്തെ തള്ളിക്കളയുന്നതാണ് ഇത്തരം പ്രസ്താവനകൾ."
അമേരിക്കൻ സമ്പദ്‌വ്യവസ്ഥയിൽ കുടിയേറ്റക്കാർ നൽകിയ സംഭാവനകളെ എടുത്തുപറഞ്ഞുകൊണ്ട് മന്ത്രാലയം കൂട്ടിച്ചേർത്തു: "തീർച്ചയായും, അമേരിക്കയുടെ ചരിത്രം തന്നെ തലമുറകളായി വന്ന കുടിയേറ്റക്കാരുടെ അധ്വാനവും സംരംഭകത്വവും നവീകരണവും കൊണ്ടാണ് രൂപപ്പെട്ടത്. വേദനാജനകമായ ചരിത്രപരവും കൊളോണിയൽപരവുമായ അർത്ഥങ്ങൾ പേറുന്ന വാക്കുകൾ ഉപയോഗിക്കുന്നത് അങ്ങേയറ്റം അപമാനകരമാണ്."
പ്രൊഫഷണലുകളുടെ ഈ പങ്കാളിത്തം ഇരു രാജ്യങ്ങൾക്കും പ്രയോജനകരമാണെന്നും, അമേരിക്കയിൽ ഗവേഷണം, ഉൽപ്പാദനക്ഷമത, മത്സരക്ഷമത, തൊഴിലവസരങ്ങൾ എന്നിവ സൃഷ്ടിക്കുന്നതിനൊപ്പം ഇന്ത്യൻ പ്രൊഫഷണലുകൾക്ക് അവസരങ്ങൾ ഒരുക്കുന്നുണ്ടെന്നും ഇന്ത്യ ചൂണ്ടിക്കാട്ടി.
