ശബരിമല സ്വര്ണക്കൊള്ളക്കേസ് പ്രതി എ പത്മകുമാറിനെതിരായ നടപടിക്ക് സിപിഐഎം. നടപടി ചര്ച്ച ചെയ്യാന് സിപിഐഎം പത്തനംതിട്ട ജില്ലാ കമ്മിറ്റി ഈമാസം 15 ന് ചേരും. പത്മകുമാറിനെതിരെ നടപടിയെടുക്കാതെ മുന്നോട്ട് പോകാനാകില്ലെന്ന് സംസ്ഥാന കമ്മിറ്റി വിലയിരുത്തല്. പദ്മകുമാറിനെ പാര്ട്ടി പരിപാടികളില് നിന്ന് മാറ്റി നിര്ത്താന് മാത്രമായിരുന്നു ഇതുവരെയുള്ള നിര്ദേശം. കഴിഞ്ഞ ആഴ്ചയാണ് പദ്മകുമാര് പാര്ട്ടി അംഗത്വം പുതുക്കിയത്.പാര്ട്ടി നടപടി പ്രഖ്യാപിക്കും മുമ്പേ പത്മകുമാറിനെ ജില്ലാ കമ്മിറ്റിയുടെ ഔദ്യോഗിക വാട്ട്സ്ആപ്പ് ഗ്രൂപ്പില് നിന്ന് നീക്കിയത് ഏറെ ചര്ച്ചയായിരുന്നു.പത്മകുമാറിനെ ഇതുവരെ പൂര്ണമായി തള്ളിക്കളയാനോ പൂര്ണമായി ഉള്ക്കൊള്ളാനോ തയ്യാറാകാത്ത പാര്ട്ടി ഇനി എന്ത് നിലപാടാകും ഇക്കാര്യത്തില് എടുക്കുക എന്നത് വലിയ ആകാംക്ഷയാണ്.സ്വര്ണക്കൊള്ളയില് വിശദീകരണം തേടി പാര്ട്ടി പത്മകുമാറിന് നോട്ടീസ് അയയ്ക്കുകയും തെറ്റ് ചെയ്തിട്ടില്ലെന്ന് പത്മകുമാര് വിശദീകരണം നല്കുകയും ചെയ്തിരുന്നു. കേസില് അറസ്റ്റിലായി 105 ദിവസത്തിന് ശേഷമാണ് രണ്ടു കേസുകളില് ജാമ്യം ലഭിച്ചതിനാല് പത്മകുമാര് പുറത്തിറങ്ങിയത്. ശബരിമല കട്ടിളപ്പാളി കേസിലും ദ്വാരപാലക ശില്പ്പ കേസിലുമാണ് കൊല്ലം വിജിലന്സ് കോടതി ജാമ്യം നല്കിയത്.
