ഇന്ത്യയിലെ ഏറ്റവും വേഗത കുറഞ്ഞ ട്രെയിൻ എന്ന് അറിയപ്പെടുന്നത് നീലഗിരി മൗണ്ടയിൻ റെയിൽവേ ആണ്.
മേട്ടുപ്പാളയം മുതൽ ഊട്ടി വരെ
നീലഗിരി കുന്നുകളുടെ കുത്തനെയുള്ള ഭൂപ്രദേശങ്ങളിലൂടെയാണ് ഈ റെയിൽവേ കടന്നു പോകുന്നത്. അതുകൊണ്ടാണ് സാധാരണ പാസഞ്ചർ ട്രെയിനുകളെ അപേക്ഷിച്ച് വളരെ കുറഞ്ഞ വേഗതയിൽ ഈ ട്രെയിൻ സഞ്ചരിക്കുന്നത്.
പാതയിലെ കുത്തനെയുള്ള വളവുകളും കുത്തനെയുള്ള ചെരിവുകളും സുരക്ഷയ്ക്കായി രൂപകൽപന ചെയ്ത ഇടുങ്ങിയ പർവത ട്രാക്കുകൾ, കയറ്റം കയറാൻ വേണ്ടി ഉപയോഗിക്കുന്ന ഒരു സവിശേഷ റാക്ക് – ആൻഡ് – പിനിയൻ സംവിധാനം, കുന്നിൻ പ്രദേശങ്ങളിലൂടെയുള്ള നിരവധി തുരങ്കങ്ങൾ, പാലങ്ങൾ, വളവുകൾ എന്നിവയെല്ലാം വേഗത കുറയ്ക്കുന്നതിനുള്ള കാരണങ്ങളാണ്. സാവധാനത്തിലുള്ള യാത്ര പ്രകൃതി ഭംഗി ആസ്വദിച്ച് യാത്ര പൂർണമായി അനുഭവിക്കാൻ സഞ്ചാരികളെ അനുവദിക്കുന്നു.
∙യുനെസ്കോ ലോക പൈതൃക അനുഭവം
യുനെസ്കോയുടെ അംഗീകാരം ലഭിച്ച ‘ഇന്ത്യയിലെ പർവത റെയിലുകൾ’ എന്ന പൈതൃക പട്ടികയിൽ നീലഗിരി മൗണ്ടയിൻ റെയിൽവേയും ഉൾപ്പെട്ടിട്ടുണ്ട്. 1900കളുടെ തുടക്കത്തിൽ നിർമിച്ച ഈ റെയിൽവേ അതിന്റെ എൻജിനിയറിങ്, ചരിത്ര പ്രാധാന്യത്താൽ പ്രശസ്തമാണ്.
ഈ പാതയിൽ ഏകദേശം 16 തുരങ്കങ്ങൾ, 200ൽ അധികം വളവുകൾ, 250ൽ അധികം പാലങ്ങൾ, ഇടതുർന്ന വനങ്ങൾ, വെള്ളച്ചാട്ടങ്ങൾ, തേയിലത്തോട്ടങ്ങൾ എന്നിങ്ങനെ മനോഹരമായ നിരവധി കാഴ്ചകളാണ് ഈ യാത്രയിൽ ഓരോ സഞ്ചാരിക്കും കാണാൻ കഴിയുന്നത്. ഈ മനോഹരമായ പാതയും പൗരാണികതയും ലോകമെമ്പാടുമുള്ള സഞ്ചാരികളെ ഇവിടേക്ക് ആകർഷിക്കുന്നു.
