അടുക്കളയിൽ ഈച്ച വരാതെ സൂക്ഷിക്കാം

എത്ര വൃത്തിയായി സൂക്ഷിച്ചാലും ചിലപ്പോഴൊക്കെ അടുക്കളയിൽ സൂക്ഷിച്ചിരിക്കുന്ന മാവിലോ പൊടികളിലോ കുഞ്ഞു വണ്ടുകളെയോ ഈച്ചകളെയോ കാണാറില്ലേ? നമ്മൾ പോലുമറിയാതെ ഇവയെ ആകർഷിക്കുന്ന പ്രധാന കാരണക്കാർ നമ്മൾ സൂക്ഷിച്ചുവച്ചിരിക്കുന്ന ചില സാധാരണ ഭക്ഷണസാധനങ്ങൾ തന്നെയാണ്.

പഞ്ചസാരയും മധുരപലഹാരങ്ങളും

ഉറുമ്പുകളുടെയും മറ്റ് പ്രാണികളുടെയും പ്രധാന ആകർഷണമാണ് പഞ്ചസാരയും മധുരപലഹാരങ്ങളും. തുറന്നുവയ്ക്കുന്ന മധുരപലഹാരങ്ങൾ, സിറപ്പുകൾ, തേൻ എന്നിവയോടൊപ്പം ഷെൽഫിൽ വീഴുന്ന ചെറിയ പഞ്ചസാരത്തരികൾ പോലും ഉറുമ്പുകളെ കൂട്ടത്തോടെ ക്ഷണിച്ചുവരുത്തും.

മാംസം

പച്ചയോ വേവിച്ചതോ ആയ മാംസത്തിൽ നിന്നുള്ള ശക്തമായ ഗന്ധവും പ്രോട്ടീനും ഈച്ചകളെയും പാറ്റകളെയും ആകർഷിക്കുന്നു. കട്ടിങ് ബോർഡിലോ കൗണ്ടർടോപ്പിലോ വീഴുന്ന മാംസത്തിലെ നീര് പോലും പ്രാണികളുടെ പ്രധാന ഭക്ഷണസ്രോതസ്സാണ്

അമിതമായി പഴുത്ത പഴങ്ങൾ

അമിതമായി പഴുത്തോ പുളിച്ചോ തുടങ്ങുന്ന പഴങ്ങൾ പഴഈച്ചകളുടെ പ്രധാന താവളമാണ്. വാഴപ്പഴം, മാമ്പഴം, ആപ്പിൾ, മുന്തിരി എന്നിവ പഴകുമ്പോൾ പുറപ്പെടുവിക്കുന്ന പഞ്ചസാരയുടെയും ആൽക്കഹോളിന്റെയും ഗന്ധമാണ് ഇവയെ ആകർഷിക്കുന്നത്.

ബാക്കിവയ്ക്കുന്ന ആഹാരം

അടച്ചു വയ്ക്കാത്ത കറികൾ, ചോറ്, പരിപ്പ്, പച്ചക്കറികൾ എന്നിവ എളുപ്പത്തിൽ പ്രാണികളുടെ കണ്ണിൽപ്പെടും. ഭക്ഷണം കാണാൻ കേടില്ലെന്ന് തോന്നിയാൽ പോലും അതിൽനിന്നുള്ള ഗന്ധം പിടിച്ച് പാറ്റകളും ഈച്ചകളും എത്തും.

ബ്രെഡ്, ബിസ്കറ്റ്, ധാന്യപ്പൊടികൾ

ഗോതമ്പുപൊടി, മൈദ, ബ്രെഡ്, ബിസ്കറ്റ്, ധാന്യങ്ങൾ എന്നിവ വണ്ടുകൾക്കും പുഴുക്കൾക്കും പ്രിയപ്പെട്ടതാണ്. കടലാസ് അല്ലെങ്കിൽ നേർത്ത പ്ലാസ്റ്റിക് പാക്കറ്റുകൾ തുളച്ച് അകത്തുകടക്കാൻ ഇവയ്ക്ക് കഴിയും.

എണ്ണയും കൊഴുപ്പുള്ള അവശിഷ്ടങ്ങളും

എണ്ണമയമുള്ള ഭക്ഷണ അവശിഷ്ടങ്ങളും സ്റ്റൗവിനു ചുറ്റുമുള്ള കൊഴുപ്പും പാറ്റകളെ പെട്ടെന്ന് ആകർഷിക്കും. ഭക്ഷണസാധനങ്ങൾ മാത്രമല്ല, ഇത്തരത്തിലുള്ള എണ്ണമയവും അടുക്കളയിലെ കീടശല്യം കൂട്ടുന്നു.

വളർത്തുമൃഗങ്ങളുടെ ഭക്ഷണം

നായകൾക്കും പൂച്ചകൾക്കും നൽകുന്ന ഭക്ഷണം പലപ്പോഴും നാം ശ്രദ്ധിക്കാതെ പോകുന്ന ഒന്നാണ്. ധാന്യങ്ങളും പ്രോട്ടീനും കൊഴുപ്പും നിറഞ്ഞ ഇവ പ്രാണികളുടെ താവളമായി മാറാൻ സാധ്യതയേറെയാണ്.