തിരുവനന്തപുരം: കേരളത്തിന്റെ ആരോഗ്യവകുപ്പില്‍ മന്ത്രിയും പ്രിന്‍സിപ്പല്‍ സെക്രട്ടറിയും തമ്മിലുള്ള അധികാരത്തര്‍ക്കം പുതിയ തലത്തിലേക്ക്. ഭരണ പരമായ കാര്യങ്ങളിലെ കടുത്ത വിയോജിപ്പുകളും ഫയല്‍ നീക്കങ്ങളിലെ കാലതാമസവും ചൂണ്ടിക്കാട്ടി ആരോഗ്യമന്ത്രി കെ. മുരളീധരന്‍ മുഖ്യമന്ത്രിക്ക് ഔദ്യോഗികമായി അതൃപ്തി അറിയിച്ചു. പ്രിന്‍സിപ്പല്‍ സെക്രട്ടറിയെ സ്ഥാനത്തുനിന്ന് മാറ്റണമെന്ന കടുത്ത നിലപാടിലാണ് മന്ത്രിയെന്നാണ് സൂചന.
സര്‍ക്കാര്‍ തലത്തില്‍ സ്വീകരിക്കുന്ന സുപ്രധാന നയങ്ങള്‍ നടപ്പാക്കുന്നതില്‍ പ്രിന്‍സിപ്പല്‍ സെക്രട്ടറിയുടെ ഭാഗത്തുനിന്നും വീഴ്ചയുണ്ടാകുന്നുവെന്ന് മന്ത്രി ആരോപിക്കുന്നു. കഴിഞ്ഞ സര്‍ക്കാരിന്റെ കാലത്തെ ആരോഗ്യവകുപ്പ് ക്രമക്കേടുകളുമായി ബന്ധപ്പെട്ട 35-ലധികം കേസുകളില്‍ തുടരന്വേഷണം വേണ മെന്ന തീരുമാനത്തില്‍ കാര്യമായ പുരോഗതിയില്ല. മുന്‍ സര്‍ക്കാരിന്റെ കാലത്തെ ഉദ്യോഗസ്ഥരെയും മറ്റും സെക്രട്ടറി സംരക്ഷിക്കുന്ന തരത്തിലാണ് നടപടികളെന്നും പരാതിയുണ്ട്.
സംസ്ഥാനത്ത് മരുന്നുകളുടെ കടുത്ത ക്ഷാമം അനുഭവപ്പെടുമ്പോഴും, അടിയന്തരമായി ടെന്‍ഡര്‍ നടപടികള്‍ പൂര്‍ത്തിയാക്കാന്‍ സെക്രട്ടറി തയ്യാറാകുന്നില്ല. ഇത് വകുപ്പിന്റെ പ്രതിച്ഛായയെ ബാധിക്കുന്നുവെന്ന വിമര്‍ശനവും ശക്തമാണ്. ഭരണപരമായ കാര്യങ്ങളില്‍ മന്ത്രിയുടെ നിര്‍ദ്ദേശങ്ങള്‍ പോലും കൃത്യമായി പാലിക്കപ്പെടുന്നില്ലെന്ന പരാതി ശക്തമായതോടെ, വരും ദിവസങ്ങളില്‍ ആരോഗ്യവകുപ്പില്‍ വലിയ ഭരണഘടനാപരമായ മാറ്റങ്ങളോ അഴിച്ചുപണികളോ ഉണ്ടായേക്കുമെന്നാണ് രാഷ്ട്രീയ നിരീക്ഷകരുടെ വിലയിരുത്തല്‍.
