ആരാധകർ ഏറെ പ്രതീക്ഷയോടെ കാത്തിരുന്ന സൂപ്പർസ്റ്റാർ രജനികാന്തിന്റെ 'ജയിലർ 2' സിനിമയുടെ ട്രെയിലർ പുറത്തുവിട്ട് അണിയറ പ്രവർത്തകർ. നേരത്തെ വൻ വിജയം നേടിയ 'ജയിലറി'ന്റെ രണ്ടാം ഭാഗമാണ് 'ജയിലർ 2'. നെൽസൺ ദിലീപ്കുമാർ സംവിധാനം ചെയ്യുന്ന ചിത്രം സൺ പിക്‌ചേഴ്സാണ് ബിഗ് ബഡ്ജറ്റിൽ ഒരുക്കിയിരിക്കുന്നത്. രജനികാന്തിനൊപ്പം സുരാജ് വെഞ്ഞാറമൂട്, ജാക്കി ഷെറോഫ്, മിഥുൻ ചക്രവർത്തി, ഹൃത്വിക് റോഷൻ, മോഹൻലാൽ, ശിവരാജ്കുമാർ, വിജയ് സേതുപതി, എസ്.ജെ. സൂര്യ, യോഗി ബാബു, വിദ്യ ബാലൻ, മിർണ, പൂർണ, നോറ ഫത്തേഹി തുടങ്ങി വൻ താരനിരയും അണിനിരക്കുന്നുണ്ട്.
തമിഴ് സിനിമയിലെ ഏറ്റവും വലിയ ബോക്‌സ്ഓഫീസ് ഹിറ്റായി 'ജയിലർ 2' മാറുമെന്നാണ് ആരാധകരുടെ പ്രതീക്ഷ. ചിത്രം 1000 കോടിയിലേറെ രൂപ കളക്ഷൻ നേടുമെന്ന പ്രതീക്ഷയും ആരാധകർ സോഷ്യൽ മീഡിയയിൽ പങ്കുവയ്ക്കുന്നുണ്ട്. അനിരുദ്ധിന്റെ പശ്ചാത്തല സംഗീതത്തിന്റെ അകമ്പടിയോടെ ആക്ഷനും കോമഡിയും നിറഞ്ഞതാണ് രണ്ടാം ഭാഗത്തിന്റെ ട്രെയിലർ. പതിവ് സ്റ്റൈലിൽ രജനികാന്ത് എത്തുന്ന രംഗങ്ങളാണ് ട്രെയിലറിലെ പ്രധാന ആകർഷണം.
എസ്.ജെ. സൂര്യയും വിദ്യ ബാലനും ശ്രദ്ധേയമായ സാന്നിദ്ധ്യമാണ് ട്രെയിലറിൽ കാഴ്ചവയ്ക്കുന്നത്. തുടർന്ന് മോഹൻലാലിന്റെയും ശിവരാജ്കുമാറിന്റെയും സാന്നിദ്ധ്യത്തോടെ ആക്ഷൻ രംഗങ്ങൾക്ക് വേഗം കൂടുന്നു. രജനികാന്തിന്റെ മാസ് രംഗങ്ങളും ട്രെയിലറിൽ നിറഞ്ഞുനിൽക്കുന്നുണ്ട്. ആക്ഷനും മാസ് രംഗങ്ങൾക്കുമൊപ്പം കോമഡിക്കും പ്രാധാന്യം നൽകുന്ന ചിത്രമായിരിക്കും 'ജയിലർ 2' എന്ന സൂചനയാണ് ട്രെയിലർ നൽകുന്നത്. ഒക്ടോബർ 15 ന് ചിത്രം ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും.
